Kea ‑nɩa 'blʋa nʋɩ ke nyʋ 'pʋʋi ke‑
33
Ao "isrɛnyʋ ‑wee'‑ "klein, ao nʋʋ Tʋ "bo 'mʋa‑ i.Kea 'a 'nynɩ "i 'bɛɛa' nmɔɔ "isrɛnyʋ 'wɔn i.
2 Ao "duo blaadɩ ‑wee'‑ "klein 'ʋn,
ao 'je ble ao 'je Tʋ "bo 'nynɩ ‑sa.
3 Ao 'ble 'dʋ dee‑, ao 'jeɛ 'da.
Ao nmɔ dɩ blasʋn 'kwa ao 'jeɛ 'da.
4 Dɛ ‑nʋɛ, ɛmɛ ‑nɩ Tʋ "bo 'a nʋʋdɩ
‑wee'‑ "klein nɩɛ tɔ' ‑tɩ.
5 Kea a 'jeɛ "isrɛa' ke ‑maa' 'wlʋ wlu "kpei 'a "dia.
Tʋ "bo 'a nyɔ 'ɔ ‑tɩ' kmaa' "ji 'blʋa 'mɛ.
6 Tʋ "bo nʋɛ wlu ɛ je jaʋn nʋ,
pooɔ' ‑wlʋa 'de ɛ 'wɔn mɛ ɛ nʋ 'cɩ ‑sɩɩn.
Wɛe ɛ ‑tee jrɩ' kpɔi" 'de "bi klae" 'di.
7 Ɛ 'fea 'tɔniɛ 'ɛ ‑gboe ‑wɛe ɩ ‑tee' 'di
‑wɛe ɛ poo ɩ ‑gblo" 'dei ɩ nʋ "ni pɛʋn‑.
8 'blʋa ‑wee'‑ "klein ‑te' Tʋ "bo 'a ni',
‑wɛe nyʋ "klein ‑nɩa 'kmʋ 'jeɛ ‑pee plee‑.
9 ‑Bo ɛ 'na dɛ nɩ 'sʋ ɛ nɩ', ‑bo ɛ 'na ɛ ji 'sʋ ɛ ji'.
10 Dɩ 'blʋadinyʋ pooa Tʋ "bo ‑gba' ‑mɩ ja,
‑wɛe dɩ ʋʋ ‑tea' ʋʋ 'jea nʋ, ɛ dooa ‑mɩ.
11 'Kaa dɩ Tʋ "bo ‑tea', ‑mɩ nɩ', ka nyɔ 'ɔ kpɔ ɔ ‑sia'
'ka dɩ ɛ pooa' ɩ nɩ 'kmʋ 'de nɔ 'oo nɔ" ‑wee'‑ 'di.
12 'Mʋa‑ nʋ 'blʋa ‑ɛɛ Kea Tʋ "bo nɩa,
'mʋa‑ nʋ 'blʋa ɛ ‑sa 'e mu
‑wɛe ‑ʋʋ ‑tea ɛɛ' ‑tea' a,
13 Tʋ "bo nɩɛ 'de jaʋn 'di
‑wɛe ɛɛ ‑gbʋn 'de 'blʋa "kpei,
‑wɛe ɛɛ ‑gbʋʋn' nyiɔɔ' "nynuu ‑wee'‑ "kpei i.
14 Ɛ nɩɛ 'de ɛɛ' ‑tein,
‑wɛe ɛɛ kpaa nyʋ "klein ‑nɩa 'de 'blʋa "kpei "i "jriɛ i.
15 Ɛmɛ ‑nʋ' ʋʋ ‑wee'‑ 'a pɛe
‑wɛe ‑ɛɛ sie ʋʋ ‑wee'‑ 'a nʋʋdʋ "jriɛ o.
16 "Sʋɩ ‑tuu" a 'pʋʋ 'blʋa jei‑,
‑kladia' 'a ‑seie ‑tapoi‑.
17 Soo"‑ 'a "nyɩ nyʋ tʋ 'a "jru kpaa',
ɛɛ' "ikmaa' seɛ 'bɛɛ‑ ɛ 'je nyʋ ‑seie
18 Tʋ "bo a siɛ nyʋ ‑ʋʋa pleeɛ "jriɛ o,
ɛ ke nyʋ ‑ʋʋ ‑tea ɛɛ' nyʋ 'a ‑tɩ' kmaa' ‑kwlɩ" ke‑.
19 ‑Wɛe ɛ 'je ʋʋpʋ‑ ‑seie 'de 'mɛɛa' 'kwa,
'de ʋʋ 'je 'kmʋ nɩ ‑bo ɛ nɩ mɩɩɛ nɔ" mɔ 'de ɛ.
20 ‑Apʋ mɔ tba Tʋ "bo tɔi",
ɛmɛ ‑ɛɛ po ‑a sʋn o, ‑wɛe ‑ɛ ‑kaan ‑a "i.
21 'Mʋa‑ ‑nɩa 'de ‑a pɛe o ɛ, ɛ 'wlʋɛ 'de ɛ 'ʋn.
Ɛɛ' 'nynɩ ‑kweai mɛ ‑a ‑te' ‑kwlɩ".
22 Tʋ "bo, ‑ma nyiɔɔ' ‑tɩkmaa' ‑nɩ 'de ‑a "kpei
ka ‑a ‑teɛ' ‑kwlɩ" ɛ.